Bismilaahi Raxmaani Raxiim.

Waxaan Marka hore halkan tacsi uga dirayaa Eheladii Qaraabadiii iyo dhamaan asxaabtii ay ka baxeen dadkii masaakiinta ahaa ee lagu laayey guryahooda iyagoo caafimaad qab ku seexday, waxaanan ilaahay uga baryaya inuu janadii farduusa ka waraabiyo dhamaanteena samir iyo iimaan inaga siiyo Aamiin, Sida aad lawada socotaan dilkan ka dhacay Degmada Seemaal maaha kii u horeeyey ee sidan oo kale loogu laayo dad aan waxba galabsan ee waa kii 3aad ee noociisa ah ee ka dhaca Deegaanakan.

11/07/2009 Jidgooyadii Kalabaydh ee lagu laayay afartii haldoor ee safarka ahaa waxay aheyd waqti doorashadii madaxtooyada loo ololeynayey, cid wax ka qabatayna ma jirin oon ka ahayn in la dajiyo oo hadalo aan macno lahayn iyo balanqaadyo aan jirin dadka lagu meeweeliyo taasoo aakhirkiina noqotay mid gabi ahaanba la iska iloobay lakiin aanay marnaba iloobi Karin qaraabadii iyo dadkii ay ka dhasheen iyo dhamaanta inta damiirkoodu caafimaad qabo oo aan marnaba ogolayn in dulmi lagula kaco qof aan waxba galabsan.

Dilkii labaad wax uu dhacay 12/12/2010 Habeen-mirkii lagu khaarajiyey oday iyo inankiisa – KAXDA ISHAGUDBAN, waxay aheyd waqti ay reer Gabiley aad ugu hadaaqayeen “Siilaanyo sidaan ugu lisnay nooguma hambayn” Dilkaasoo isna aan waxba laga qaban aan ka ahayn waxbaan ka qabanaanaa iyo dajin hor leh oo la mida tii hore ee lagu laayay afartii hal door. Dhacdadii ugu danbaysay oo iyana dhacday 05/12/2011 Habeen-mirkii lagu kharajiyey oday, inankiisii & oday – SEEMAAL – waa waqti loo diyaargaroobayo doorashada golayaasha degaanka, Baarlamaanka & Guurtidaba, ayaa waxa bilaabmay dhaqdhaqaayo ay dawladu ku soo qabqabnayso gacanku dhiiglayaashii ama eedaysanayashiii ka danbeeyey dilalkan kuwaasoo qaar xil haya iyo qaar aan xil ka hayn xukuumada siilaanyo iskugu jira, waxa dhacaday in xabsiga loo taxaabo xubno badan oo ka mid ah salaadiin iyo siyaasiyiin lagu tuhunsan yahay inay door mihiim ah ka qaateen dilalka isdaba jooga ahaa ee ka dhacayay deegaanka Ceel-berdaale, iyadoo dhanka kale aan ilaa hada gacanta lagu soo dhigin kuwii falkan fuliyey ee Duurka joogay, Hadaba hadaan usoo noqdo ujeedaada aan maqaalkan usoo qoray oo ah inaan dadka u iftiimiyo in waraysi uu wasiirka arimaha dibada ee s.land siiyey mar uu u waramayey shabakada subulahanews,com, wasiirka arimaha dirabada oo markii uhoraysay ka hadlay arintii seemaal(Halkan guji si aad u akhrisato) isaga oo ku sugnaa magaalada gabiley kaasoo u sheegay in xidhxidhitaanka Salaadiinta iyo Siyaasiyiinta reer Gabiley uu yahay mid aan lagu hayn wax dambiya ama cadayn ah ee laakiin uu yahay mid lagu dajinayo dadkii dadka laga laayay ee reer Dilla.

Hadaba hadalka noocaas oo kale ahi ma yahay kuwo uu ku hadli karo qof mansab dawladeed hayaa, mase tahay hadal u cuntami kara dadka reer Awdal oo dawlada uga fadhiyay inay fuliso balanqaadkii ahaa inay soo qab qabanayso gacan ku dhiig layaasha isla markaaana maxkamad la soo saaro.

Hadaba haduuu wasiirkii arimaha dibada sidaa uhadlayo oo hawlaha ay dawladu ku jirtaaba ayna dhaafsanayn dajin iyo raaligalin oo ayna ahaynba in gacanta lagu soo dhigo lana maxkamadeeyo dadkii dilkan foosha xun leh ka danbeeyey. Dhan kale  Dadka reer Dilla oo ah dad gob ah oo aan asal iyo hido midna aan u lahayn jidkooyo ama dad qalnimo loo gaysto dad safar ah ama maati ah oo aan waxba galabsan sida ka suurtowday dhigooda reer gabiley oo iyaga ay ula mid tahay wax iska caadi ayaa hadalkanioo ula muuqda mid qayrul masuulnimo ah oo aanay ka sugayn nin masuul dawladeed ah.

Guntii iyo Gabagabadii hadii cadaaladii iyo balanqaadkiiba ay isugu soo biyo shubteen Dajin la dajiyo dadkii dhibtu soo gaadhay iyo qancin la qanciyo dadkii reer Gabiley ee dhibta gaystay iyagoo lagu qancinayo in masuuliyiinta la xidhxidhay ay tahay xal lagu dajinayo arinta, Markaa maxaa la gudboon dadkii dhibtu soo gaadhay?

Mustafa Nur
Jamacshara1@hotmail.com
Sweden.

Categories: Dood (Debate)