Sheekada dhexmartay saaxiibkay iyo inantiisa yar ayaa dib ii xasuusisey dood cilmiyeed ku saabsan haweenka ilmaha caloosha ku jira iska soo rida oo aan hada kahor ka qayb galay. Dad badan ayaa waxay ku doodayeen inay dumarku xaq u leeyihiin in ay wixii calooshooda ku jira (ilmaha) sidii ay doonaan ka yeelaan. Dad aan anigu ka mid ahaana waxa ay ku adkaysteen in ilmaha yar ee caloosha hooyada lagu dilo aysan waxba ka duwanayn qof weyn oo dil bareer ah loo gaystay. Haweenay ka mid ahayd dadkii dooda ka qayb galay oo aan filayo inay aniga hadalka iila jeeday ayaa tiri “caruurta qolana caloosha ayay ku dilaan kuwana xabad ayay ku toogtaan” Waxaan soo xasuustay inay arintaasi sax tahay oo kumanaan caruur Soomaaliyeed ah dagaaladii lagu laayay.

Waxaa xusid mudan in ay jiraan dad badan oo wadaniyiin ah oo mudo dheer sidii najaasadii iskaga ilaalinayey inay dhexgalaan wixii loogu yeeri jiray dib u heshiisiin, shirweyne qaran, iyo dhisme dowlad ku meel gaar ah oo dhamaantood caqabad ku noqday xal ay umadu gaarto maadaama qabyaaladii wax burburisay aas’aas looga dhigay.

Sanadkan 2012-ka waxaa muuqda isbadal weyn. Dad badan ayaa waxay u adkaysan waayeen inay gaariga kuraasta dambe u fadhiyaan iyadoo uu shukaanta hayo qof aan baarbuur wadista aqoon u lahay oo habda darbi ku garaacaya. Hadaba su’aasha is waydiinta mudani waxay tahay; Yaa ku haboon in uu maanta Soomaali hogaamiyo? Waxaan filayaa in aan masiirka ummada lagu aamini karin qofkii leh tilmaamaha hoos ku qoran.

1. Qof dagaaladii sokeeye ka qayb galay. 2. Qof qabiil soo sharaxday. 3. Qof lunsaday hanti qaran. 4. Qof wata mabda’ firqo-diineed doonaysa inay xoog ku maquuniso dadka aysan isku aragtida ahayn. 5. Qof aan aqoon hore loo lahayn oo aan la ogayn kartidiisa iyo waxauu qaban jiray taariikhdiisa oo idil. 6. Qof aan soo bandhigin qorshihiisa uu dalka ku maamulayo oo dhamaystiran. 7. Qof doonaya in uu laaluush ku helo madaxtinimada.

Iyadoo ay nasiib daro tahay in aysan dadkeenu haysan fursad ay ugu codeeyaan shakhsigii ay mustaqbalkooda ku aamini lahaayeen, ayaa waxaa jira taageero xagga niyada ah oo ay musharixiinta qaarkood mar hore kasbadeen. Tusaale waxaa noogu filan xisbiga Hiil-Qaran iyo Musharixiisa madaxweynaha, Prof. Axmed Ismaaciil Samatar. Habeenkii Axada ee ay taariikhdu ahayd May 27, 2012 ayaan internetka ka helay video-gan oo laga duubay xaflad uu ururka Hiil-Qaran dhawaan ku qabtay gobolka Minnesota ee dalka Maraykanka. Fadlan daawo!

http://www.youtube.com/watch?v=PQArKs0ExpU&feature=related

Waxaan marar badan ku celceliyay qaybta ugu danbaysa ee uu Prof. Axmed Ismaanciil Samatar uga hadlayo ujeedooyinka ururka. Isla habeenkii waxaan saxiixay xubinimada ururka Hiil-Qaran oo aan u arko inuu ku taagan yahay wadada badbaadinta iyo barwaaqaynta Soomaaliya. Dhamaan walaalaha fursada u heli kara waxaan ka codsanayaa in ay booqdaan hiilqaran.org ayna is barbar dhigaan Prof. Axmed I Samatar (halkan ka daawo taariikh nololeedkiisi:

iyo dadka kale ee madax doonka ah.

Abdirizaq Ahmed Minnesota, USA