Ururka TLC   oo ah urur  hogaan bulsho, oo qurbaha laga soo abuubulay gaar ahaan woqooyiga Ameerika, kuna bahoobeen haldoorka waxgaradka Gadabuursi.  Waa Urur  wax badan laysku dayay  in halkiisaas lagu buburiyo,  oo aanu soo dhaafinba.

Dawladihii hore ee soo maray Somaliland, gaar ahaan tii ugu danbyaysay ee UDUB, waxba ulama hadhin buburinta ururkaasi. Dawaladda wakhtigan xaadirka ah ka jirta Somaliland, ee KULMIYE . Iyada qudhideedu dawgii ay  jeexday ee shirar beeleedyada fasaxay ayuunbaa fursad u siiyay inuu Tolku Boorma ku shiro mooyiye, waxba ulama hadhin, kaliya way is daad raacisay

Intii Somaliland jirtay ma dhicin in waxgaradka Ummadda Awdal ee qurbaha iyo qooyskuba isugu yimaadaan shir noocan kale oo si gaar ah loogaga arrinsanayo danaha iyo hogaanka gaarka ah ee bulshada Awdal.Waxa sidaa daraadeed xusid mudan in wada-xaajoodka waxgaradka Awdal uga qabsoomay Boorama uu yahay bilowgii Baraarujinta iyo baylah tirka bulsho-weynta beelaha Gadabuursi ee dalka gudihiisa iyo dibadiisaba.  Balse aanu ahayn dhammaadkii buburinta tolka, ama hadii aynu si kale u dhigno ‘ma aha ururkii duminayay bulshada Awdal, ee gaadhsiinayay burburka ugu danbeeya’

Balkan  maanta la dhigay  Boorama, ma ahayn mid kuraas lagu qaybsanayay, mana ahayn mid laysugu faanayay cudud iyo cod reereed, mana aha bal wali la laabay. Kaliya wuxu ahaa ayaa la odhan karaa, madal loogu gogol xaadhayay midnimada iyo wadajirka mustaqbalka ummada, waana bal furan, oo waligii an la laabi doonin, ilaa inta la helayo hoggaan dhammaystiran iyo ummad hanuunsan.

Saxaafadda Awdal qaarkeed ayaan ku aragnay  dad badan soo taxay magac badan oo ama beel ahaan ku diidaya shirkaas ama beel ahaan ku taageeraya shirkaas iyo wixii la mid ah. Iyo shaqsiyaaad si gaar uga faaloonaya aragtidooda ku wajahan isla wada xaajoodka wax garadka TOL, iyagoo si gaar ah farta ugu fiiqiya shaqsiyaad kale oo TLC ka mid ah.

Hadaba, waxa la odhan karaa, way la waayeen,  ama way marin habaabeen,  dadyoowgaas is maandhaafsan, ee baaqyada soo qorayi,  haddii haddafkoodu yahay shaqsi jeclaysi ama shaqsi necbaysi  iyo wixii la xidhiida,  oo ah wax an looga baahnayn lana jaan qaadi karin ujeedada shirka Tolka.

Hadal iyo dhammaantii, meel kasta iyo mar kastaba  waxa jira si wax xun u sheeg , isagoo laga yaabo inuu qofkaaas sida wax xun u sheegayi aanu is ogayn inuu wax xumaynayo, balse is leeyahay waxbaad wanaajisay.  Bal dee waayahaye, maxaynu ku diidnay maalin kaliya oo aynu midoowno,  qofkii baabana aynu baanano, kuna wada bogsoono bilowga baraarujinta Tolka?.

HiilDan

Categories: Badheedhe (Editorial)