DAALLACAN

Dir Soomaaliyaan ahay

Dadkii geeska baan ahay

Diillilmaha midabkana

Maariin dabiiciya

Dugul Iyo casaan xiga,

Diintana furqaaniyo

Xaqa Eebbe daafaca

Marka taa in lagu daro

Daacadiyo hir baan ahay

Marka dawlad dhalataba

Daruuraha hadheeyee

Dul hoganaya baan ahay.

Nabad dooje baan ahay

Dugsi lagu ledaan ahay

Dibindaabyo Iyo been

Damiirkaygu ma oggola

Deriskayga kuma shido

Dogob dhamacyo waawayn

Fadhi kii ku diririyo

Doodaha qotoda-dheer

Luqun-diinleyaashii

isu dira sokeeyaha

Debanahayga uma furo

Dayimkeen siduu yiri

Hadduu duul nifaaq ihi

War duul-duula soo gano

Idinkoon daraasayn

Degdeguna idiin Hodin

Hubi diiradlayeey

Daf haddaad tiraahdaan

Hadmaad dacar ka leeftiin

Dib u qoomamaysiin

Dorraatiyo ayaamii

Taxanaha dunidiyo

Dura tii la soo maray

Diihaalka mahadhada

Baallaha ku daabacan

Wiil daymo dheeroo

Dayniile joogoo

Gaarriye loogu magac-daray

Soomaali ul-iyo-diir

Ku dardaarmayaa jiray.

Daah-furkii wuxuu yiri

Dugsi male qabyaaladi

Waa dararta baahida

Waa astaanta dib-u-dhaca

Dabuubtaas xaqiiqda ah

Nin ay damaqday baa jiray.

Dar kastoo samaa jecel

Dullin baa ku hoos Jira

Midhahaba dirxaa Gala

isha dabani waa cadaw

Ilaa doorkan maanta ah

Halka xaajo doogtiyo

Daqarrada ku leedahay

Hoosba yaa u dayay weli

Sawtani lays Wada dilay

Nin kastaba Nin Kale dagay.

Danni Iyo ladh baa Jira

Danan Hoose baa Jira

Hoos-ka-tuurka duriddiyo

Damac sheellan baa Jira

Danaysiyo han baa Jira

Degaamayn horlaa Jira

Docna weeerar halisiyo

Shax baa layga dagayaa

Anna Waan digtoon ahay.

Ha yeeshee danbeeyiyo

Doollar qaateyaal Iyo

Waaxo iga dibboodoo

Laygu daw-galaa Jira

Doolli i qaniinoo

Miciyaha halkuu daray

Dib u neefiyaa jira

Daanooyin Igu Wada

Bohol soo dumaysoo

Hoos loo dalooshoo

Dabna laygu shiday baa

Sida laba daryaalaha

Duman lagu yagleeloo

Dusha laga qurxiyayoo

Soo deg laygu leeyahay

Nin dardaaran hore qabay

Duco waalid soo dhamay

Digdig Iyo is-dhiib Iyo

Debcin mayso qayladu

Inta derejo sheegtiyo

Duud-caddaaleyaashii

Waxay daabulaan iyo

Deeqduna wax siin Iyo

Diif-jabkayga maahee

Dabar-go’ayga weeyaan.

Barihii daliilkaa

Ii dhigay duruustee

Deelleey Iiga horreeyoow

Da’ waliba markeed lehe

Aniguna Dig baan iri.

Dad waxaan u neceb ahay

Marka xaajo dalab hihi

La soo deristo beelaha

Kuwa laba-gar-daaqee

Durba Talo ka boodee

Maahmaahyo daadshee

Yiraa maxaan ku daalaa

Dooryaanleba timirtii

Dab iyada Oon loo helin.

Ma dabayl xagaa baa

Un-tuna Dillaal iyo

Dusdus iyo xin badanaa

Dub malaha riyuhu e

Missna waa damaaciyoo

Idahay ku digataa

I arkaay i daawadaay

Ma is dayax-bixin baa?

Duni Aakhir saman Oo

Dalli dheer ka lulatoo

Demmen yahay raggeedii

Dhaka-faar daraaddii

Cuskanaysa daamaha

Halyaygiina laga dilay

Nin-doorkii ka haajiray

Daranyootayoo nacab

Dugayadu u wehel tahay

Daa’imo ku keli tahay

Daryeelkooda jeceshahay

Waqalkuna u di’in Wali

Daashadeen abaaruhu

Maryeheedda duuggiyo

Dildillaaca waaxyaha

Dusha Sare ka muuqdaa

Tolloow Yay damqaysaa

Yayse daawo u tahayoo

La sii jecel duruufaha

Ka macaasha dib-u-dhaca?

Dal-jirkii xaqlaha ahaa

Aga mici-dugaagliyo

Dibad-yaallo baa helay

Nixinoon digiigixin

Timo dabanta beledkiyo

Duxi halkii ay taallaba

Ku dummaala shilimaad

Xarrumaha dakayntiyo

Duffankiyo wax-saarka le

Yaallo malabkii doocaan

Iyagaa faraha dara

Dubaaxdoo ku neefsada.

Waa Degel la Iibsaday

Daltabyada ninkii qabay

Dudayoo ka suudalay

Daydaydii la dhaqan-celi

Ha yeeshee dirayskii

Markii Dooddi loo xidhay

Dablii xoogga qarankiyo

Ciidankeenna lagu daray

Dooraneeyaashii

Nin kastoo dun lagu taxay

qoys buu u dool yahay.

Dawankii qabiilkiyo

Sidii buu durbaankii

Dig leeyohoo u dhacayaa

Ilamaa darwiishkii

Wax is doorshay Lama arag!

Daa’imay Islaamkii

Calankii dul Iyo baar

Isagaa ku daabacan

Distoorkaana sheegoo

Wuu og yahay dad-waynuhu

Ha yeeshee danbiilaha

In xadkiisa lagu Duwo

Runtii waa la dala’saday

Dooxatada wax laysiyo

Jar abeeso duubnayd

Imisaa ku dalaq Tiri

Lagu daray xabaalaha

Lays odhanin yaa dilay?

Waa cuqubo da’wayn Oo

Laga doogsan waayoo

Deribtii sokeeyaha

dubatoo ku naaxdee

Dhaqtarrada dalkaygoow

Culimada dalkaygoow

Digtoorkiyo xidigiskoow

Cudurada dahsooniyo

Naflihii dardaran iyo

Jinka Waad dawaysaan

Saadaasha dooxdaan

Dacwaddiinan yaabka le

Miyaydaan ku dari-hayn

Dacuunkiyo waxyeelada

Joogee na daashaday

Mise waa diyaafado

Diib Iyo Iidaan loo

MArka wiil la duugaad

Dheefteed u dareertaan

Dabiib miyaad u waydeen?

Xoolaa dareemiyo

Doog loo abuuroo

Durdurkiyo la geeyaa

Duurkii caleenlee

Dadkuse waa ka gooniye

Jaadkuna ma daawiyo

Ma daruuri dheeflaa?

Daayeerkaa Laamaha

Dheemaalka dookhee

Soowtani laga daray

Taajir duunyo beeliyo

Intuu reero dumiyiyo

Inta diricyo waashee

Nacas Iyo hal-doorba le

IMuxuu wiilal duufsaday

Dib-jiroo habaaboo

Dugsiyada ka saaqiday?

Hableheenna dahabkuna

Mid soo dadab xereeyiyo

Diiriye ma helinoo

Dalal Kalay u foofeen

Doollaalka waayaha

Waqtigaa dibleeyoo

Guumaysnimo dar-jiidhshoo

In la doono Lama filo

Danbeedada xanuunka le

WAa shaacoo ma daahnoo

Diiwaanka biiraa

Dar Alle ka maragoo

Dafiraadi kama taal.

Doonida kharaabka ah

Dakhaliyo lahayn Hage

Ninka fuulayee duuul

Dawaaf yiree u heesoow

Gal-daloooladeediyo

Iimeheeda dararta ah

Dawladeennu leedahay

Anigaa duraayee

Horta intayna kula Degin

Ma ka daadagaysaa,

Dabadeed awaalaha

Baaraan-deg xoogliyo

Dardar maw badheedhnaa,

Duqaydiyo waayeelkii

Daahyaale soo jiray

U darsaday nasiiniyo

Daryeel Iyo xannaanayn

Maw dammaanad qaadnaa

Bara-kaca dan-yartiyo

Reero dire-diraalayn

Soo dumaayda qaylada

Innagaysku diiree

Guluf mayska daynaa?

Duuray Iyo dhiggeedii

Daryankii bir-jeex Iyo

Dumintii man-dheeriyo

Haddii dacar la soo dhamay

Ragna soo dagaal galay

Dib-u-noqoshadeennii

Dar kaloo waxaa  Jiray

Dejin Iyo u hawl-galay

Dekenii colaadaha

Iyo damaq-dhaygoodii

Dayibkii SULEEXIYO

SAYAX Iyo dirkiisii

Daraygeennii GOODAAD

Doorkii XAAJI KHAYRIYO

DA’SANTII is kaashaday

Kuman duugan Oo Kale

Taariikhdeenna duuugga ah

Baal dahab ah kaga qoran

In kaloo u diyaaroo

Daafaha adduunkiyo

Wali daahan baa Jira

Dawse maaha Eexee

Maan-deeq hasheeniyo

Duunyo qaranku leeyahay

Yaa danbarsadoo Dhama

Dadka kalena ka xigsada?

Diqriyoo tixdaydii

Durkiyoo ballaadhsoo

Daloonbiyay itaalkay

Deeddankiina Kula dhacay

Dubbuur xeelligeediyo

Daalo Saylac laallays

Dermaan baan ku joogee

Afartiisa daafiyo

Tamashlaha dal-waynaha

Durdurrada ku baashaal

Degelkoo abaariyo

La il-daran Bus mooyee

Kalla daadsanaan Iyo

Kuma arag is-diiddaba

Duraygii heblayntiyo

Dayayn maaha uguboo

Soomaalay la dihatee

Kanse  duur-xul weeyoo

Daad dhiig ma soo rogo

Siyaasaa-na daynsada.

Saddex Dibi warkoodiyo

Aarkii duullanka ahaa

Duufaanku waabshee

Siigadu daldalatee

Calooshiisa daallinkiyo

Dalqadaaba wadatee

Inay wada-jir dayr tahay

Daallacee garwaaqsaday

Deexdiyo tabtiisii

Dawaar Kale intuu rogay

Diga-gedishadiisii

Daallaa-dhac soo kacay,

Dacawada geddeediyo

Muujay debecsanaantii

Ee yiri duq baan ahay

Iyo socoto dool ehe

Deris nabad ku nooloo

Ka dhaxaysa daawiyo

Dan-wadaag ma noqonaa

Dabadeedna sirayee

isu diray dhammaantood

Danbaysadeennu Yay noqon..

Gabay daaqsin gayntii

Iyo soo dabrayntii

Dixaa aynu naalliyo

Daanteenna mooyee

Kama dayo hareeraha

Mana dayn karaayee

Door-roone soo kacay

Hadduu jaanta Igu daro

Malahayga soo duro

Galbeed bari damaashaad

Gudaha Iyo dibaddaba

Gurxankiyo babteeduna

Hoboladu ku biiraan

Bi’i Waan u goohee

Boobe Ina ducaaloow

Dan-jirkiii samaayoow

Adaa qalinka daabkiyo

Deebaanka haystoo

Taariikhda duubee

Anigoo DUBLIN Jira

Dal shisheeye kaa xiga

Salaamaha Aan soo diray

DAALLACANna iga hano

Da’da maansayahankiyo

Dalladaha barbaartee

Ka hawl-gala dalkeenniyo

Dumar-wayneheennii

Maamulkana dareensii

Adigaa Dalmar ahoo

Duunida la haystee.

Qalinkii.Siciid Cali Sharmaarke